Croeso i chweched flwyddyn Gwyl Ffidil yr Wyddfa. Tyfodd yr wyl o’r clwb ffidil lleol, Clwb Ffidil yr Wyddfa; y bwriad oedd codi ymwybyddiaeth o chwarae ffidil traddodiadol yn yr ardal, rhoi llwyfan i’r cyfoeth o gerddoriaeth ffidil Gymreig, a rhoi siawns i ni glywed a dysgu gan brif ffidlwyr traddodiadol gwledydd eraill.
Pentref bach tlws Nant Peris ar odre’r Wyddfa ydy cartre’r wyl, sydd wedi dod yn adnabyddus am ei naws cartrefol, cynnes. Mae’r dathlu yn cychwyn nos Wener gyda sesiwn agored yn ystafell gefn glyd y Vaynol Arms. Yn ystod y dydd Sadwrn mae gweithdai ffidil ac offerynnau eraill i bob safon gan gynnwys siawns i drio’r crwth (hen offeryn Cymreig), yn ogystal â chocsio a gweithgareddau i blant megis chwedleua, dringo a sioe pypedau. Yn dilyn yr hwyl gawsom ni llynedd, bydd cyngerdd meic-agored yn y dafarn eto amser cinio, i’w dilyn gan sesiwn agored drwy’r prynhawn; croeso i bawb ymuno. Lleolir y cyngerdd gyda’r nos yng Nghapel Rehoboth, bron yn gyferbyn â'r dafarn - yn gyfleus iawn ar gyfer y sesiwn wedyn!
Ymhlith yr artistiaid sydd wedi chwarae yma clywyd Roots'n'Galoots, Stephen Rees, John Dipper, Maria Jonsson ac Ian Carr, KilBride, Siân Phillips, Christine a Jo Cooper, y deuawd Estonaidd/Cymreig SILD a’r New Rope String Band, yn ogystal â llawer o ffidlwyr lleol. Eleni mae cyngerdd nos Sadwrn yn cyflwyno Ceri Rhys Matthews a Christine Cooper, ynghyd a’r ffidlwyr Dan Morris a Gwilym Hardy.
Mae Ceri Rhys Matthews o Dde-Orllewin Cymru bellach yn wyneb cyfarwydd yn yr ardal a fyntau yn diwtor yn y Galeri, Caernarfon. Yn bibydd, yn ffliwtydd, yn byrlymu brwdfrydedd dros ein cerddoriaeth gynhenid, daeth ynghyd â Christine Cooper, ffidlwraig ifanc, ddawnus o Ddinbych y Pysgod, i greu deuawd sy’n cyfleu prydferthwch cerddoriaeth a chaneuon Cymru mewn dull cywrain a thyner.
Yn hanu o Ddolgellau, ond bellach yn byw yn Llandeilo, bydd chwarae cyhyrog, meistrolgar Dan Morris yn gyfarwydd i bawb sy’n cofio’r grwp gwerin dylanwadol Cilmeri, ac roedd yn sylfaenydd y band Gwerinos yn ddiweddarach. Hefyd bydd Gwilym Hardy, ffidlwr ifanc o Aberystwyth, yn dod â gwyneb a thalent newydd i’r wyl.
A ffidlwyr lleol Clwb Ffidil yr Wyddfa a’r dirgel Tri Mwsgreadur yn ymuno ar y llwyfan, mae safon y gerddoriaeth yn addo bod o’r radd flaenaf eto eleni.
